Германиянинг "Гамбург" клуби ҳужумчиси Сон Хеинг Мин бош мураббий Чой Канг Хининг энг асосий умиди бўлиб турибди. Кеча Пажудаги терма жамоа базасида кореяликлар икки гуруҳга бўлинган ҳолда мини ўртоқлик ўйинини ўтказишди.

Олдинги кунларда жисмоний ҳолатни яхшилаш ва танани мослаштириш машқларига эътибор қаратган корейслар ўртоқлик учрашуви орқали асосий таркибга мос футболчиларни танлаб олишни мақсад қилишди. Ушбу ўртоқлик учрашувида асосий эътибор Сон Хеинг Минга қаратилди. Бундеслигада ажойиб мавсумни ўтказган футболчи ўртоқлик ўйинида 2та гол киритишга эришди. Мини ўртоқлик ўйинида дастлабки бўлимда "А" жамоада Ли Донг Гук билан ҳужумда ҳаракатланган бўлса-да гол киритишнинг уддасидан чиқа олмади. Сўнг иккинчи таймда у футболкасини Ли Кеун Хо билан алмаштирди ва "B" жамоада ҳаракатланиб, 2 та голни дарвозага жойлади. У ҳужум чизиғида кўпроқ Ким Шин Вук билан яхши тил топишмоқда ва 11 июнь куни корейслар ҳужум чизиғида Сон Хеинг Мин - Ким Шин Вук жуфтлигини кўрсак ажабмас.

У Пажудаги машғулотлар якунига етгач Кореянинг "ОСЕН" нашрига қисқача фикр билдириб: "Терма жамоада Ким Шин Вук билан сўзсиз бир-биримизни тушуняпмиз. "Гамбург"да латвиялик Артёмс Рудневс билан яқин бўлганим каби Ким Шин Вук билан терма жамоада ака-укадекмиз. Биз иккимиз Ўзбекистонга қарши ўйинда қандай ҳаракатланишни кўп муҳокама қиламиз. Ўзбекистонга қарши ўйинда ҳам "Гамбург"дагидек юқори даражада ўйнашни мақсад қилганман. Бош мураббийимиз менга ишонч билдирмоқда ва бу ишончни оқлайман", деди.

Отабек Йўлдошев, Жанубий Корея, Сеул