Мадриднинг "Реал" клуби ҳужумчиси Винисиус Жуниор "Реал Сосьедад"га қарши ўйинда иккита голли узатма амалга ошириб, жамоасининг Испания Кубоги финалига чиқишига ёрдам берди.
Ярим финал жавоб учрашуви "Сантьяго Бернабеу"да бўлиб ўтди ва 4:4 ҳисобида якунланди. "Қаймоқранглилар" иккинчи экстра-таймнинг 115-дақиқасида Антонио Рюдигер томонидан киритилган гол эвазига финалга йўл олди. Икки ўйиндан иборат қарама-қаршилик якуни - 5:4.
Винисиус жамоадошларига икки марта голли пас узатди ва "Атлетико" футболчиси Анхель Корреани (10) ортда қолдириб, Испания кубоги тарихида голли паслар сони бўйича учинчи ўринга чиқиб олди (12). Рейтингда фақатгина ўтмишда "Барселона" шарафини ҳимоя қилган Жорди Альба (15) ва Лионель Месси (27) юқорида жойлашган.
