"Удинезе" марказий ҳимоячиси Умар Соле Италия ва Англия клублари эътиборига тушган бўлса-да, айнан "Наполи" француз учун рақобатда рақибларидан ўзиб кетишни мақсад қилган кўринади.
Соле январь ойида "Удинезе"га текинга ўтди, чунки унинг "Ред Булл Зальцбург" билан шартномаси 2024 йилги ёзги трансфер ойнаси ёпилгандан сўнг бекор қилинган эди. Ўшандан бери у барқарор ўйин кўрсатиб келмоқда, бу эса топ-клубларнинг қизиқишига сабаб бўлди.
Sky Italia журналисти Лука Маркетти хабарига кўра, "Наполи" Соленинг трансфери устида фаол ишламоқда ва "Удинезе" билан имкон қадар тезроқ келишувга эришишга ҳаракат қилмоқда.
"Удинезе" 24 ёшли ҳимоячини тахминан 20 миллион еврога баҳолаши кутилмоқда. Солега "Наполи"дан ташқари "Вест Хэм" ва "Манчестер Юнайтед" клублари ҳам қизиқиш билдирмоқда.
Эслатиб ўтамиз, ҳимоячи жорий мавсум "Удинезе" сафида барча мусобақаларда 11 та ўйинда 1 та гол ва 1 та голли узатмага муаллифлик қилган.
