Миср терма жамоаси ва "Ливерпуль" ҳужумчиси Муҳаммад Салоҳ клуб билан шартномасини узайтириш борасида бир қатор муваффақиятларга эришди.
Footmercato нашри хабарига кўра, Салоҳ ва "Ливерпуль" янги икки йиллик шартнома имзоламоқчи. Манба берган хабарга кўра, жамоа раҳбарияти маош бўйича ён беришга тайёр, аммо тўловларнинг аниқ миқдори номаълумлигича қолмоқда.
Аввалроқ мисрлик футболчига Саудиянинг "Ал-Ҳилол" клуби қизиқаётгани маълум бўлганди. Салоҳ жорий мавсумда турли мусобақаларда 43 та ўйинда 32 та гол урди ва 22 та голли узатмани амалга оширди. Унинг клуби чемпионатда ишончли тарзда пешқадамлик қилмоқда ва "Арсенал"дан 9 очко олдинда.
