"Манчестер Сити" бош мураббийи Пеп Гвардиола Кевин Де Брюйненинг клубдан кетиши ҳақидаги хабарларга муносабат билдирди.

"Бу – қайғули кун. Шу билан бирга, қувончли кун ҳам, чунки у билан бирга ўтган вақт биз учун шунчалик завқли бўлдики, у бизга берган барча нарсалар – инсонийлиги ҳам алоҳида эътирофга лойиқ.

Сўнгги ўн йилликдаги ютуқларимизни усиз тасаввур қилиш имконсиз – бу ҳақида кўп гапириш шарт эмас. Қайғули кун, чунки жамоамизнинг бир бўлаги кетмоқда. Венсан [Компани], Серхио [Агуэро] ёки Давид Силва кетганида ҳам шундай бўлган эди. Уларнинг жамоага қўшган ҳиссаси... яна бошқа кўплаб футболчиларни айтишим мумкин, аммо бу уч футболчи – яққол намуна бўла оладиганлари.

Бу – қайғули кун. Аммо ҳали олдимизда 10 та ўйин бор, умид қиламанки, 11 та бўлади. Улардан 6 таси – уй ўйинлари, бу орқали биз мухлислар билан биргаликда яна уни завқ билан кузатишимиз мумкин бўлади. Ишончим комил – у ўзига муносиб муҳаббат ва эътирофни олади, бунга ҳам жамоа, ҳам мухлислар тайёр", - деди испаниялик мутахассис.