Кучли бешликнинг ўзини оладиган бўлсак, «Милан» 1991/92 мавсумида, «Арсенал» 2003/2004, «Ювентус» 2011/12 ва ўтган йили «Байер» мавсумни мағлубиятсиз ўтказиб чемпионга айланишганди. Яъни деярли ҳар 10 йилда бир марта содир бўлмоқда.

Англияда «Арсенал»дан олдинга борсак, 19-асрга тушиб кетамиз, Испанияда бундай мавсум ўтказган чемпион 95 йил олдин кузатилганди. Ҳа, бир неча йил аввал «Барселона» яқин келган, аммо сўнгги турда ютқазиб қўйганди. Ўшанда барселоналиклар чемпионлик масаласини аввалроқ ҳал қилгани учун тарихий рекордга мотивация етишмаган.

Бугун Францияда чемпионликни расман ҳал қилган «ПСЖ» учун мана шунақа интрига бор - Францияда  мавсумни мағлубиятсиз ўтказган илк жамоага айланиши мумкин. Атиги 6 тур қолди. Агар Чемпионлар Лигасига эътибор қаратилиб ёки мотивацияни тушириб юбориб, ютқазиб қўйишмаса.

Парижликлар 13-чемпионликка эришишди, шундан 11 таси шайхлар даврига, яъни 2012 йилдан буёғига тўғри келади. Ҳаммаси ўхшаш мавсумлар, ўхшаш ютуқлар. Буниси ажралиб туриши ва хотирада қолиши учун ҳам ҳаракат қилиб кўриш керак.