Ўзбекистонлик футболчи Элдор Шомуродов Италия чемпионати 31-турида “Ювентус” дарвозасига гол уриб, “Рома”ни мағлубиятдан қутқариб қолди. У Римдаги баҳсда захирадан майдонга тушиб, ҳисобни тенглаштирди.

Ўйиндан сўнг ҳужумчи Dazn нашрига интервью бериб, ўйин ҳақида ўз фикрлари билан ўртоқлашди:

"Захирадан тушишимдан олдин Ранери мендан Артёмга ёрдам беришимни сўради. Иккинчи бўлим яхши бошланди, афсуски, ғалабани қўлга кирита олмадик. Яна бир гол уришимиз мумкин эди, лекин “Ювентус”га қарши бир очко ҳам ёмон эмас. Гол урганимдан хурсандман. Агар дубль қайд этганимда, янада яхши бўларди".

Шунингдек, Элдор яқинлашиб келаётган Рим дербиси ҳақида ҳам фикр билдирди:

"Дербига жиддий тайёргарлик кўришимиз керак. Шу пайтгача нима қилган бўлсак, худди шундай давом эттирамиз. Энг муҳими, мухлисларни хурсанд қилиб, керакли натижага эришишни истаймиз".

Маълумот учун, 31-турдан кейин “Ювентус” 56 очко билан турнир жадвалининг 5-поғонасидан жой олди. “Рома” 53 балл билан 7-ўринни эгаллаб турибди.