"Бавария" Лерой Сане билан шартномани узайтирмоқчи.
Мюнхен клуби спорт директори Макс Эберль 29 ёшли вингерга янги шартнома таклиф қилишни режалаштирмоқда, деб ёзади Sky Sport журналисти Флориан Плеттенберг. Бу ҳақда директорлар кенгаши ва кузатув кенгаши хабардор қилинган ва футболчи билан ҳамкорликни давом эттиришга розилик билдирган. Чунки Саненинг ўйини тобора ишончлироқ бўлиб бормоқда, футболчининг ўзи эса қолишни жуда хоҳлайди.
"Бавария" футболчи билан 3 йиллик шартнома имзолаш имкониятини муҳокама қилмоқда. Лерой маошини камайтиришга тайёр.
"Арсенал" ҳамон Санега қизиқиш билдирмоқда ва сўнгги кунларда футболчи томон билан алоқага чиққан. Аммо немис учун устувор вариант - "Бавария" билан шартномани узайтириш.
Лерой жорий мавсум Бундеслигада 24 та ўйинда майдонга тушди ва 9 та гол ҳамда 4 та голли узатмага муаллифлик қилди.
