13 апрель, якшанба куни Чемпионлар лигаси чорак финалида иштирок этаётган жамоалар ичида фақатгина “Реал Мадрид” ўйин ўтказади. “Қаймоқранглилар” Испания Примерасининг 31-турида “Алавес”га қарши баҳс олиб боради.

Чемпионлар лигасининг ушбу босқичининг яна бир иштирокчиси “ПСЖ” – “Нант” ўртасидаги ўйин парижликлар илтимосига кўра 13 апрелдан 22 апрелга кўчирилди, чунки француз гранди “Астон Вилла” билан ўйинлар оралиғида тикланиш учун кўпроқ вақт олишни исташди.

Чемпионлар лигаси чорак финалида иштирок этаётган қолган олти жамоа 12-апрель, шанба куни миллий чемпионатдаги ўйинларини ўтказди.

Аввалроқ, Ла Лига "Реал"нинг "Алавес" билан ўйинни шанба кунига кўчириш ҳақидаги илтимосини рад этганди. "Лос Бланкос" бош мураббийи Карло Анчелотти бу қарорни тушунарсиз деб атади. 16-апрель, чоршанба куни “Қироллик клуби” Чемпионлар лигаси чорак финалининг жавоб учрашувида “Арсенал”га қарши майдонга тушади.