“Пахтакор” клуби президенти маслаҳатчиси Максим Шацких Қозоғистон нашрига берган интервьюсида “Турон” сафида порлаётган ўзбекистонлик ярим ҳимоячи Беҳруз Асқаров ҳақида фикр билдирди.

22 ёшли Асқаров яқинда “Қизилжар”га қарши ўйинда захирадан майдонга тушиб, гол ва ассист муаллифи бўлди. Шунингдек, “Атирау”га қарши Қозоғистон Кубоги учрашувида ҳам голли узатма берди. Унинг ўйини нафақат Қозоғистонда, балки Ўзбекистонда ҳам катта эътибор қозонмоқда. Ҳатто уни келажакдаги Ҳусанов деб атаётганлар бор.

Бироқ Шацких бу таққослашга қўшилмайди:

"Ҳусанов ва Асқаров бутунлай бошқача футболчилар. Улар позицияси, жисмоний ҳолати ва техник жиҳатдан фарқ қилади. Мен Беҳрузни яхши биламан. Жуда яхши бола, тартибли ва истеъдодли. “Пахтакор”да у кўп вақт ўйнамаган, сабаби рақобат кучли эди, қолаверса, у тез-тез терма жамоада бўларди".

Мураббий унга бир нечта позицияда имкон берганини ҳам айтиб ўтди:

"Асқаровни ҳимоянинг турли нуқталарида ҳам синаб кўрганман — таянч зонаси, чап ва ўнг қанот ҳимоячиси сифатида ҳам. У барча топшириқларни сифатли бажарган".

Шацких Асқаровнинг интеллектуал даражаси юқори баҳолади:

"Футбол — бу биринчи навбатда ақл спорти. Беҳрузда бу бор. Унга фақат кўпроқ ўйин амалиёти керак. Потенциали катта. Балки биринчи босқичдаёқ “Манчестер Сити”га ўта олмас, лекин у кучли жамоада ўйнашга қодир футболчи ҳисобланади".

Маълумот учун, Беҳруз Асқаров қишки трансфер ойнаси пайтида “Пахтакор”дан Қозоғистоннинг “Турон” клубига ижара асосида кўчиб ўтган эди. У Ўзбекистоннинг турли ёш тоифасидаги терма жамоалари сафида ўйнаган. Ҳозирда Ўзбекистон U-23 жамоасининг асосий таркиб футболчиси ҳисобланади.