11 июнь куни Сеулдаги World Cup стадионида ЖЧ-2014 саралаши, 4-босқич 9-туридан ўрин олган учрашувда Жанубий Корея ҳамда Ўзбекистон миллий терма жамоалари баҳс олиб боришди. Ушбу учрашувда Миржалол Қосимов бош мураббийлигидаги Ўзбекистон миллий терма жамоаси 0:1 ҳисобида имкониятни бой берди.
Учрашувдаги ягона гол биринчи бўлимнинг 42-дақиқасида киритилди. Жанубий Корея терма жамоаси вакили Ким Йонг Воннинг Ўзбекистон жарима майдончасига узатиб берган тўпини миллий терма жамоа ҳимоячиси Акмал Шораҳмедов, кутилмаганда ўз дарвозасига йўллаб қўйди.
Гуруҳнинг сўнгги тур учрашувлари 18 июнь куни бўлиб ўтади. Унда Ўзбекистон миллий терма жамоаси Тошкентда Қатарни қабул қилса, Эрон Жанубий Кореяга қарши сафарда ўйнайди.
Қуйида Жанубий Корея - Ўзбекистон учрашувидаги эсда қоларли вазиятлар акс этган фотосуратларни томоша қилишингиз мумкин:
Анвар Илёсов,
"Жаҳон" АА.
