Бразилиянинг "Сантос" клуби матбуот хизмати жамоа юлдуз ҳужумчиси Неймарнинг жароҳат олгани ҳақида хабар тарқатди. Футболчи яқинда "Атлетико Минейро"га қарши ўйинда жароҳат олганди.
"Неймарнинг чап сонида оғриқ пайдо бўлди. У тиббий кўрикдан ўтди, натижада мушакларнинг шикастланиши аниқланди. Футболчи аллақачон даволанишни бошлаган. Керак бўлса, футболчининг тезроқ тикланиши учун реабилитацияда турли усуллар қўлланилади," - дейилади клуб хабарида.
Неймар қишки трансфер ойнасида "Сантос"га ўтди. 33 ёшли ҳужумчи клуб билан 2025 йилнинг ёзига қадар шартнома имзолаган.
