"Милан" жамоаси бош мураббийи Сержиу Консейсау А Серия 33-туридан ўрин олган "Аталанта"га (0:1) қарши ўйиндан кейин келажаги ҳақидаги саволга жавоб қайтарди.
"Россонерилар" турнир жадвалида тўққизинчи ўринда бормоқда ва еврокубок зонасидан узоқлашишда давом этмоқда, бу эса португалиялик мураббийнинг мавсум якунида истеъфога чиқиши мумкинлиги ҳақидаги миш-мишларни янада кучайтирмоқда.
"Мен келганимда Италия Суперкубоги ва А Сериянинг биринчи ўйинида ғалаба қозонгандик, аммо ўша пайтлардаёқ одамлар мендан кейин "Милан"ни бошқариши мумкин бўлган мураббийларни муҳокама қилишаётганди. Менда бу борада муаммо йўқ, мен футболда 40 йилдан бери ишлайман, лекин мен билан ишлайдиган одамлар бу воқеаларнинг барчасини кўришади ва бу барқарорликка ҳисса қўшмаслиги аниқ.
Мен ҳурматни кўрмаяпман. Мен ҳақимда гўё ҳеч қачон мураббий бўлиб ишламагандек гапиришади. Келажагим - "Интер" билан бўлажак ўйинга тайёргарлик," - дея Консейсаунинг сўзларини келтиради Football Italia.
