"Манчестер Сити" ярим ҳимоячиси Кевин Де Брюйне клуб унинг хизматларидан воз кечганидан ҳайратда қолганини тан олди.
"Шаҳарликлар" аллақачон Де Брюйненинг мавсум охирида тугайдиган шартномаси узайтирилмаслигини тасдиқлаган. Кевин клубдаги 10 йилдан сўнг эркин агент сифатида кетади.
Де Брюйненинг сўзларига кўра, бу унинг қарори ҳам эмас, ҳатто қўшма қарор ҳам эмас - "Манчестер Сити" 33 ёшли бельгиялик футболчини бир томонлама рад этган.
"Очиғи, мен бироз ҳайрон бўлдим, лекин буни қабул қилишим керак. Тўғрисини айтсам, мен ҳали ҳам бу даражада ўйнай оламан, деб ҳис қиляпман, буни ҳозир кўрсатяпман, лекин клублар қарор қабул қилишлари кераклигини тушунаман.
Балки, агар жамоа учун қийин вақт бўлмаганида ва мен одатдагидек жараёнга шу тарзда қайтганимда, улар бошқача қарор қабул қилган бўларди", - деди Де Брюйне The Guardian билан суҳбатда.
