"Рома" ва "Милан" клублари "Реал" бош мураббийи Карло Анчелотти билан ўз жамоаларини бошқариш таклифи билан боғланишди. Бу ҳақда La Gazzetta dello Sport хабар бермоқда.
Манбага кўра, 65 ёшли мутахассис Италиядан тушган таклифларни кўриб чиқишга тайёр. Таъкидланишича, иккала клуб ҳам Анчелоттидан жавоб кутмоқда.
Италияда Анчелотти "Режина", "Парма", "Ювентус", "Милан" ва "Наполи" клубларида бош мураббий сифатида ишлаган.
Аввалроқ ОАВда италиялик мутахассис жорий мавсум охирида ишдан бўшатилиши мумкинлиги ҳақида хабарлар пайдо бўлган эди. Анчелоттининг "Реал" билан шартномаси 2026 йилнинг ёзигача амал қилади.













