Эрон терма жамоасининг Корея ва Ўзбекистон билан рақобати хусусида терма жамоа собиқ бош мураббийи Фаркий Ҳусайн Fars News ахборот агентлигига интервью берди. Мураббий фикрларини қисқа ва аниқ қилиб тушунтиргани эътиборни тортади.

"Терма жамоа Ливанга қарши жуда яхши ўйин намойиш этди. Барчамиз келгуси ўйинда ҳам яхши натижага ва Жаҳон чемпионати йўлланмасига умид қиляпмиз. Футболчиларимизда имконият ўз қўлларида ва улар бор кучлари билан ўйнаяптилар. Терма жамоамиз имкониятларини Корея мураббийи ва бошқа мутахассислар тўғри баҳоламаётган кўринади.

Мен Ўзбекистон-Қатар ўйинини ҳам Кореяга қарши ўйинимиздан кам бўлмаган оптимистик руҳ билан томоша қиламан. Эрон терма жамоаси ўйини рақибга босим ўтказиш, кураш, югуриш ва аниқлик асосига қурилган. Яна шуниси ҳам муҳимки, ўйинчилар барча эътиборларини майдонга қаратишлари зарур. Олдимизга қўйилган ЖЧ йўлланмаси мақсади шуни тақозо этади, бошқа илож йўқ. Гарчи жамоа учун бу юқори босим юкласада. Агар Корея гол урадиган бўлса, унда бу жамоани энди мағлубиятга учратиб бўлмай қолади", дея фикр юритган эронлик мутахассис.

Фаркий Ҳусайн сўзининг давомида тарихни, жумладан Осиё ўйинларида Кореяни мағлубиятга учратишганини эслаб ўтди. Аммо ўшандан кейин 2002 йилги ЖЧда улар тўртинчи ўринни олишганини, Эрон эса саралашдан ўтолмаганини таъкидлади.

Мураббий келгуси учрашувда энг катта юк Карлос Кейрушга тушишини айтиб ўтди. Шунингдек, уни ЖЧга тўғридан-тўғри олиб чиқиши учун терма жамоага бош мураббий этиб тайинлашганини эслатди. "Плей-офф" орқали йўл эса анча мураккаб бўлишини таъкидлади. Шу ўринда Кейрушга маслаҳат берар экан, терманинг собиқ бош мураббийи жумладан шундай деди: "Кейрушга маслаҳатим, у ўйин пайти иложи борича ҳотиржамликни сақлаган ҳолда иш олиб бориши керак. Майдондаги ўйинчилар уни заҳира ўриндиғида ўзига ишонч билан ўтирганини кўришсин. У тажрибали мураббий ва албатта фақат гап билан иш битмаслигини яхши тушунади. Ўйин олдидан футболчилар олдида тушунмовчилик, ҳеч қандай саволлар бўлмаслиги, ҳаммаси ҳал қилинган бўлиши керак".