Трент Александр-Арнольд Арне Слотга март ойида "Ливерпуль"ни тарк этишини маълум қилганди.
Бугун ҳимоячи мавсум якунида клубни тарк этишини расман эълон қилди. Трент "Реал"га ўтишни оғзаки келишиб олгани ҳақида хабарлар тарқалган эди.
The Athletic хабарига кўра, Трент март ойида терма жамоалар билан боғлиқ танаффус пайтида, ҳимоячи жароҳатидан тикланаётганда, бош мураббийга ўз қарорини айтган. Тахминан ўша вақтда инглиз вакили "Ливерпуль" спорт директори Ричард Хьюзни ёзда тугайдиган шартномани узайтиришдан бош тортгани ҳақида расман хабардор қилган.
Слот ҳафсаласи пир бўлганини билдирди, лекин Трентнинг қарорига ҳурмат билан муносабатда бўлди: "Сен жамоанинг муҳим қисмисан, кел, мавсумни биргаликда юқори даражада якунлайлик." Трент, ўз навбатида, мураббийни "Ливерпуль"дан кетиши унинг жорий мавсумдаги кайфиятига таъсир қилмаслигига ишонтирди: "Мен сўнгги кунгача бу клубга бор кучимни беришда давом этаман."
Қайд этилишича, клуб Трентнинг қароридан ҳайрон бўлмаган, чунки ўша ойда шартномани узайтириш бўйича музокаралар якунланган.
Ҳимоячи жамоани чалғитмаслик учун АПЛ чемпионлигини қўлга киритганидан кейингина "Ливерпуль"дан кетишини оммага эълон қилишга қарор қилди.
