“Интер” ҳимоячиси Федерико Димарко Чемпионлар Лигаси ярим финалида “Барселона”га қарши қозонилган ғалабадан сўнг ўз таассуротлари билан ўртоқлашди. Миланликлар жавоб учрашувида 4:3 ҳисобида ғалаба қозонди (биринчи ўйин — 3:3) ва финалга йўл олди.

“Бугун нима бўлганини тасвирлашга сўз тополмайман. Бу ақл бовар қилмас ўйин эди, Чемпионлар Лигаси учун ажойиб кеча. Энди барчаси аниқ: биз бу мусобақани ютишни хоҳлаймиз, рақиб қанчалик кучли бўлишининг фарқи йўқ.

Мен бошқа стадионлар ҳақида "бу ер дўзах, дўзах" деб айтилишини эшитганман. Лекин "Сан-Сиро"га тенг келадигани йўқ. Симоне Индзаги — бизнинг раҳбаримиз, у ҳатто қийин паллаларда ҳам йўл кўрсатади. Уни фақат олқишлаш мумкин. Биз "Милан"га имкониятни бой берганимиздан сўнг вазият ўзгарди, биз ўсдик — ва бунга муносибмиз. Биз барча ютуқларга муносибмиз”, — деди Димарко.