Франция терма жамоасининг собиқ дарвозабони Стив Манданда мавсум якунланиши билан “Ренн” клубини тарк этади. Бу ҳақда Le Parisien нашри хабар берди.
2022 йилда “Марсель”дан эркин агент сифатида “Ренн”га келган 40 ёшли голкипер Франция чемпионатида жамоа сафида юздан ортиқ учрашувда майдонга тушди ва узоқ вақт асосий таркибда ҳаракат қилди. Бироқ Брис Самбанинг келиши билан вазият ўзгарди — Манданда асосий таркибдан чиқиб кетди.
Клуб ёзда якунланадиган шартномани узайтиришни режалаштирмаяпти. Айни пайтда Манданданинг келажаги ноаниқ: у бошқа клубга ўтадими, футболчилик фаолиятини якунлайдими ёки “Ренн”да бошқа ролда қоладими — бу масала ҳозирча очиқлигича қолмоқда.
Маълумки, Стив Манданда 2018 йилда Франция термаси билан жаҳон чемпиони бўлган.
