Кеча Осиё кубоги мусобақаси муносабати билан Хитойда бўлиб турган Ўзбекистон ҳамда Индонезия делегация раҳбарларининг икки мамлакат ўртасида футзал турини янада ривожлантириш, унинг оммавийлигини ошириш омиллари юзасидан ўзаро ҳамкорлик қилиш масалаларига бағишланган учрашуви бўлиб ўтди.

Индонезия футзал федерацияси раиси Мичаэл Цианипар қитъада футзали ривожланган мамлакатлар миллий терма жамоалари ўртасида халқаро турнир ташкил этиш масаласи кўриб чиқилаётганлигини қайд этиб ўтди. Турнирга аллақачон Таиланд, Япония сингари миллий терма жамоалар таклиф этилганлигини маълум қилди ва ўз навбатида Осиёнинг этакчи жамоаларидан бири Ўзбекистон миллий терма жамоасини ҳам Жакартада ўтадиган мусобақада кўришдан бахтиёр бўлишини таъкидлади.

Жаноб Мичаэл Цианипар шунингдек, қитъанинг клублар ўртасидаги энг нуфузли турнири – Осиё чемпионлари кубоги мусобақасига муқобил турнир ўтказиш ғоясини ҳам ўртага ташлади ва бу борада Ўзбекистон чемпионининг иштироки юзасида таклиф киритди.

Ҳар икка томон учун самарали кечган музокаранинг узвий давоми тез орада Ўзбекистон ҳамда Индонезия футзал федерациялари биринчи раҳбарлари миқёсида ташкил этилишига келишиб олинди.

Учрашув якунида, Ўзбекистон футзал федерацияси терма жамоалар департаменти бошлиғи Рустам Зупаров Индонезия футзал федерацияси раиси Мичаэл Цианипарга эсдалик совғалари топширди.