Kecha Osiyo kubogi musobaqasi munosabati bilan Xitoyda bo‘lib turgan O‘zbekiston hamda Indoneziya delegasiya rahbarlarining ikki mamlakat o‘rtasida futzal turini yanada rivojlantirish, uning ommaviyligini oshirish omillari yuzasidan o‘zaro hamkorlik qilish masalalariga bag‘ishlangan uchrashuvi bo‘lib o‘tdi.

Indoneziya futzal federasiyasi raisi Michael Sianipar qit’ada futzali rivojlangan mamlakatlar milliy terma jamoalari o‘rtasida xalqaro turnir tashkil etish masalasi ko‘rib chiqilayotganligini qayd etib o‘tdi. Turnirga allaqachon Tailand, Yaponiya singari milliy terma jamoalar taklif etilganligini ma’lum qildi va o‘z navbatida Osiyoning etakchi jamoalaridan biri O‘zbekiston milliy terma jamoasini ham Jakartada o‘tadigan musobaqada ko‘rishdan baxtiyor bo‘lishini ta’kidladi.

Janob Michael Sianipar shuningdek, qit’aning klublar o‘rtasidagi eng nufuzli turniri – Osiyo chempionlari kubogi musobaqasiga muqobil turnir o‘tkazish g‘oyasini ham o‘rtaga tashladi va bu borada O‘zbekiston chempionining ishtiroki yuzasida taklif kiritdi.

Har ikka tomon uchun samarali kechgan muzokaraning uzviy davomi tez orada O‘zbekiston hamda Indoneziya futzal federasiyalari birinchi rahbarlari miqyosida tashkil etilishiga kelishib olindi.

Uchrashuv yakunida, O‘zbekiston futzal federasiyasi terma jamoalar departamenti boshlig‘i Rustam Zuparov Indoneziya futzal federasiyasi raisi Michael Sianiparga esdalik sovg‘alari topshirdi.