Каталониянинг “Барселона” клуби ёзги трансфер ойнасида ўнг қанот ҳимоясини кучайтиришни режалаштирмоқда. SPOРТ нашрининг ёзишича, клубнинг асосий мақсади — “Интер”нинг 29 ёшли нидерландиялик футболчиси Дензел Дюмфрис.

Шунингдек, “Барселона” скаутлари рўйхатида яна уч нафар футболчи бор: Леверкузеннинг “Байер” жамоаси ҳимоячиси Жереми Фримпонг, Италиянинг “Фиорентина” клуби вакили Додо ва Франциянинг “Монако” жамоаси аъзоси Вандерсон.

Дюмфрис яқинда “Барселона”га қарши ўйинда майдонга тушиб, ажойиб ўйин кўрсатган ва икки марта рақиб дарвозасини ишғол қилди. Шу боис, каталонияликларнинг унга бўлган қизиқиши табиий ҳолат саналмоқда.

Дюмфрис 2018 йилдан бери Нидерландия терма жамоаси сафида ўйнайди. У “Интер”га ўтишидан аввал “ПСВ”, “Ҳеренвен” ва Роттердамнинг “Спарта” жамоаларида фаолият олиб борган.

Маълумот учун, Дензил жорий мавсум миланликлар сафида 41 учрашувда майдонга тушиб, ўз ҳисобига 10 та гол ҳамда 5 та ассист ёздириб қўйган. Унинг клуб билан шартномаси 2028 йилнинг ёзига қадар амал қилади. Transfermarkt портали ҳимоячининг қийматини 28 миллион еврога баҳолаган.