Мадриднинг "Атлетико" клуби ҳужумчиси Анхель Корреа бошқа клубга ўтишга яқин турибди.
Аргентиналик футболчини сотиб олишга Мексиканинг "Тигрес" клуби қизиқиш билдирмоқда. Журналист Фабрицио Романонинг Маттео Мореттога таяниб хабар беришича, томонлар 30 ёшли футболчининг трансферини 6 млн еврога оғзаки келишиб олишган. Агар ҳеч қандай кутилмаган ҳодиса юз бермаса, ҳужжатлар тез орада имзоланади.
Анхель Корреанинг "Атлетико" билан амалдаги шартномаси 2025/26 йилги мавсум якунлангач ўз ниҳоясига етади. Ҳужумчи 2015 йилнинг январида "матрасчилар" сафига қўшилганди. Футболчи барча мусобақаларда Диего Симеоне жамоаси сафида 463 та ўйинда жами 87 та гол урган ва 65 та голли узатмани амалга оширган.
