Франциянинг «Лион» клуби бош мураббийи Паулу Фонсека жамоа сардори Александр Ляказетт клуб сафидаги охирги ўйинини «Анже»га қарши ўтказишини тасдиқлади.
«Бугун мен Алекс билан гаплашдим. Бу ҳақиқат — ушбу ўйин унинг бу ердаги фаолиятидаги охиргиси бўлади. Бу эса жамоа учун унга чиройли тарзда хайрлашиш учун қўшимча мотивация бўлади.
У бу клуб учун ажойиб ишлар қилди. У профессионал футболчининг ёрқин намунаси, мен у билан ишлашдан мамнун бўлдим. Биз унинг шарафига зўр ўйин ўтказишимиз керак, у бунга муносиб», — деди Фонсека.
Маълумот учун, 33 ёшли Александр Ляказетт «Лион» сафида барча мусобақаларда 390 та ўйин ўтказиб, 199 та гол ва 55 та голли узатма муаллифи бўлган. Франциялик ҳужумчи фаолиятини қаерда давом эттириши ҳозирча номаълум.













