Англиялик мураббий Шон Дайч "Манчестер Юнайтед"да Рубен Аморимдан кўра кўпроқ муваффақиятга эришган бўлардим, деб ҳисобламоқда.

Жорий мавсум АПЛнинг 36-туридан сўнг "қизил иблислар" 39 очко билан турнир жадвалида 16-ўринда бормоқда.

"Менимча, агар у ерга борганимда ва мен хоҳлагандек ўйнаганимизда, кўпроқ ўйинларда ғалаба қозонган бўлардик. Оддий 4-4-2, ўйинчиларга асосий тушунчалар ва тамойилларни беринг. Уларда бир нечта яхши футболчилар бор, ҳаммасини қайта ўқитиш шарт эмас. Биз барчамиз ўзаро ҳурматга амал қиламиз, аммо Аморим маълум вақтдан бери клубда ишлайди, шунинг учун ғалаба қозониш вақти келди," - деди Дайч Stick to Football подкастига берган интервьюсида.

Инглизнинг айтишича, у ҳар доим "Манчестер Юнайтед"да ишлашни орзу қилган, чунки у клубнинг буюклигидан, хусусан, унинг ўтмишдаги натижаларидан ҳайратда.