«Бухоро» - «Динамо» (2:2) учрашувидан кейин Вадим Абрамов матбуот анжуманида иштирок этиб, ўйин борасидаги фикрларини билдирди.

- Об-ҳавога яраша ўйин бўлди. Мухлислардан узр сўрайман. Улар шунақа ноқулай об-ҳавога қарамай Самарқанддан Тошкентга келиб, стадионда қўллаб-қувватлаб туришди. Бугун майдонда жуда ёмон кўриндик. «Бухоро»ни бугунги ўйинда қўлга киритган бир очкоси билан табриклайман. Жамоам ўйини борасида эса йигитларга эътирозларим бор.

Ўйинни ташкил этиш борасида нотўғри ўйнадик. Улар деярли ҳужум қилмаётган, прессинг ҳам қила олмаётганди, бундай пайтда улар фақат стандарт вазиятларни кўзлашганди. Иккинчи бўлимда кутилмаганда бошланган чанг тўзонли ҳаво ҳам таъсир қилган бўлиши мумкин. Футболчиларимизни бу рақибга қарши руҳан тайёрлай олмагандекмиз. «Бухоро»нинг сўнгги ўйинларидаги йирик мағлубияти футболчиларимизга таъсир қилган бўлиши мумкин. Ўйин олди машғулотда ҳам йигитлар хотиржамликка берилгандек кўринишди. Бугун ютиш шарт эди, аммо дуранг қайд этдик. Ўйинни таҳлил қиламиз ва кейинги ўйинга тайёрланамиз.