“Реал” Аргентинанинг “Ривер Плейт” клуби сафида тўп сураётган Франко Мастантуонони ўз сафига қўшиб олиши мумкин. Бу ҳақда TyS Sports нашри хабар бермоқда.

Манбага кўра, “қаймоқранглилар” раҳбарияти, хусусан президент Флорентино Перес 17 ёшли ҳужумкор ярим ҳимоячининг вакиллари билан боғланган ва унинг трансфери бўйича музокаралар олиб бормоқда. Ҳозирда футболчининг агенти Мадридда бўлиб турибди.

Шунга қарамай, Мастантуоно Европага ўтишга шошилмаяпти. У ватанида яна бир оз ўйнаб, кейин кўҳна қитъага келишни истамоқда. Мадрид томон уни бразилиялик футболчи Родриго учун потенциал ўринбосар сифатида кўришмоқда, чунки Франко ҳам ўнг қанот ҳужум чизиғида самарали ҳаракат қила олади.

Аввалроқ футболчига “Милан”, “Атлетико” ва “ПСЖ” клублари ҳам қизиқиш билдирган. Харидор жамоалар уни тахминан 45 миллион евро эвазига сотиб олиши мумкинлиги айтилмоқда.

Жорий мавсумда Франко Мастантуоно “Ривер Плейт” таркибида 17 та ўйинда майдонга тушиб, ўз ҳисобига 6 та гол ва 4 та голли узатма ёздириб қўйган. Унинг клуби билан шартномаси 2026 йилнинг охиригача амал қилади. Transfermarkt портали Мастантуононинг қийматини 15 миллион еврога баҳолаган.