Англиялик собиқ марказий ҳимоячи, “Манчестер Юнайтед” клуби афсонаси Рио Фердинанд ҳозирги пайтда дунёнинг энг кучли футболчиси кимлигини айтиб ўтди. Бу ҳақда Championat нашри хабар берди.

Унга кўра, “Барселона”нинг 17 ёшли иқтидор эгаси Ламин Ямал ҳозирга пайтда топ даражада ўйин кўрсатмоқда.

"Ҳозирги пайтда дунёдаги энг яхши футболчи — Ламин Ямал. Мен бу болани жуда яхши кўраман. Ламин футболни бошқача ўйнайдигандек туюлади. Гўё унинг ҳаракатлари 28 ёшли футболчидек, аммо Ямалнинг ёши атиги 17 да. Энг муҳим вазиятларда ҳам босимсиз, хотиржам қарорлар қабул қилади. Мен Европа Чемпионлар Лигаси ярим финалининг “Интер”га қарши биринчи ўйинида унинг ҳаракатларини бевосита стадиондан кузатдим. Энг зўр жойда ўтирган эдим, яъни айнан у ҳаракат қилган қанотдан ўйинни томоша қилдим. Биринчи тайм давомида кўзим ундан узилмади. Бу — фантастика ва сўнгги йиллардаги энг зўр таймларимдан бири эди", дея Фердинанднинг сўзларини келтиради Mundo Deportivo нашри.

Маълумот учун, Ламин Ямал жорий мавсум “Барселона” сафида барча турнирлар доирасидаги 54 та ўйинда майдонга тушиб, ўз ҳисобига 18 та гол ҳамда 25 та голли узатма ёздириб қўйди.