"Барселона" президенти Жоан Лапорта бош мураббий Ханси Фликнинг Испания чемпионлигини қўлга киритганидан сўнг жамоага таъсирини юқори баҳолади.
"Ла Лигада ғалаба қозониш мақсадига эришилди. Бу энг асосийси. Флик буни кўп бор айтди ва менга унинг ҳалол ёндашуви жуда ёқади. Чунки чемпионат нафақат истеъдод, балки меҳнат, қатъият, ривожланиш ва фидойилик билан боғлиқ. Мавсум давомида қийин дамларни бошдан кечирдик ва у бизга уларни енгишимизга ёрдам берди.
Мен доим Йохан Кройфф услуби тарафдори бўлганман, лекин Ралф Рангник билан ҳам гаплашганман. Биз Тухель, Нагельсманн, Клопп, Флик номзодларини муҳокама қилдик ва бизнинг профилимизга энг мос келадигани Ханси деган хулосага келдик. Деко ва Кркичнинг саёҳати ниҳоят ҳамма нарсани ҳал қилди.
Бошқа мураббийларнинг ҳам билими бор эди, лекин баъзилари клуб мураббийи бўлмаган, бошқалари юлдузлар билан ишлашни билишмаган. Лекин Флик бу барча талабларга жавоб беради. У ҳамма нарсада яхши", - дея хулоса қилди Лапорта.
