"Интер" директори Жузеппе Маротта бош мураббий Симоне Индзагининг жамоани тарк этиши мумкинлиги ҳақидаги фикрлари билан ўртоқлашди.
Италиялик мутахассис "Ал-Ҳилол"дан жуда фойдали таклиф олди - улар мураббийга мавсум учун 30 миллион евро атрофида маош беришга тайёр. Индзаги ҳам "Интер"га баъзи трансфер талабларини қўйгани ҳақида хабар берилганди.
"Мураббий клубдан маълум нарсаларни сўраса, бу нормал ҳолат. Юқорида айтиб ўтилганидек, Индзагини хурсанд қилишга тайёрмиз.
Ҳозир барча эътиборимизни финалга қаратганмиз, кейин эса ўтириб вазиятни муҳокама қиламиз. Мен оптимистман. Симоне билан ажойиб муносабатдамиз, бу ҳали лойиҳанинг охири эмас.
Умид қиламанки, ҳаммаси худди шу руҳда давом этади", - деди Маротта.
