Баъзи манбаларга кўра, “Манчестер Сити” ва Франциянинг “Ланс” клуби ўртасидаги трансфер шартномасида махсус банд мавжуд. Бу бандга кўра, агар Хусанов жорий мавсумда “Манчестер Сити” сафида 10 та расмий ўйинда майдонга тушса, инглиз клуби “Ланс”га қўшимча 5 миллион евро миқдорида бонус тўлаши лозим бўлади.

Шу боис, молиявий мажбуриятдан қочиш мақсадида “Манчестер Сити” раҳбарияти Хусановни атайлаб фақат 9 та ўйинда майдонга тушириб, 10-ўйинни ўтказмасликка қарор қилган.

Меҳнат кодексининг 503-моддасига асосан, спортчининг меҳнат вазифаси икки қисмдан иборат:

1) Спорт мусобақаларига тайёргарлик кўриш;

2) Муайян турдаги ёки спорт турлари бўйича спорт мусобақаларида иштирок этиш.

УEФА ва ФИФА қоидаларига кўра, футболчининг спорт фаолиятига сунъий тўсиқ қўйиш, агар бу нотўғри шартнома бандлари асосида амалга оширилган бўлса, спорт ҳуқуқлари бузилиши деб ҳисобланиши мумкин.

Спортчилар меҳнат муносабатлари умумий Меҳнат ҳуқуқи доирасида шаклланса-да, уларнинг фаолияти кўплаб ўзига хос хусусиятларга эга бўлгани сабабли, бу соҳа кўпроқ Спорт ҳуқуқи орқали тартибга солинади. Яъни, спортчиларнинг меҳнат ҳуқуқлари классик меҳнат ҳуқуқидан фарқли равишда, кўп ҳолларда спортга оид махсус қонунлар, федерациялар низомлари, халқаро нормалар ва клублараро шартномалар билан белгиланади.