«Манчестер Юнайтед» ярим ҳимоячиси Бруну Фернандеш Саудия Арабистонига кўчиб ўтиш имкониятини жиддий кўриб чиқмоқда.

Журналист Бен Жейкобснинг ижтимоий тармоқларда хабар беришича, португалиялик футболчининг агенти Мигел Пиньо ҳафта бошида Ар-Риёдга етиб бориб, у ерда «Ал-Ҳилол» вакили, жумладан клуб президенти Фаҳад бин Нафал билан музокаралар ўтказган. Ички манбалар учрашувни «самарали» деб баҳолаган ва томонлар муайян илгарилашга эришганини маълум қилишган.

«Ал-Ҳилол» клублар ўртасидаги жаҳон чемпионати бошланишидан аввал трансферларни якунлашни мақсад қилган. Шу боис, клуб Фернандешдан пайшанбагача жавоб беришни сўраган. Сўнгги 48 соат ичида футболчининг розилигини олиш учун фаол ҳаракатлар амалга оширилган.

«Ал-Ҳилол» вакиллари Бруну ҳали ҳам уларнинг таклифини рад этмаганини таъкидлашмоқда. Аммо «Манчестер Юнайтед»нинг позицияси қаттиқ — клуб ўз сардорини қўйиб юборишни истамайди. Мазкур трансфер тақдири яқин кунларда ҳал бўлиши мумкин.