«ПСЖ»нинг собиқ ярим ҳимоячиси Хавьер Пасторе Неймарнинг «Барселона»дан парижликлар сафига 222 миллион евро эвазига ўтганини эсга олди.

«Бу ҳақиқатан ҳам ажойиб воқеа эди. Биз футболчи бозорда бундай катта суммага баҳоланиши мумкинлигини тасаввур ҳам қилмаган эдик. Лекин аввал унга рақиб сифатида, кейин эса бир жамоада тўп сурар экансан, бу сумма ҳатто кам баҳоланган деб ўйлайсан.

У билан бирга ўйнаш ва унинг атрофида бўлаётган воқеаларни кузатиш ҳақиқий ақлдан озиш эди. Неймар – шунчаки футболчи эмас, у бундан анча кўп нарса. Лионель Мессидан кейин мен ўйнаган энг яхши футболчи — айнан у. У трансфери орқали футболни ўзгартирди, барча қолипларни бузиб ташлади», — деган Пасторе сўзларини келтиради AS нашри.

Эслатиб ўтамиз, Неймарнинг «Барселона»дан «ПСЖ»га трансфери 2017 йил август ойида амалга ошган ва у дунёдаги энг қиммат трансфер сифатида рекорд ўрнатган — 222 миллион евро. Бразилиялик футболчи «ПСЖ» сафида 173 та ўйинда иштирок этиб, 118 та гол урган ва 79 та голли узатма амалга оширган.