Қозоғистон терма жамоаси ҳимоячиси Сергей Малий журналист Ануар Абдраҳманов билан суҳбатда ўзбекистонликларнинг футболдаги ютуқлари сабабини айтди ва Қозоғистон футболи даражасини баҳолади. Бу ҳақда Sports.kz хабар бермоқда.

«Уларда футболни ривожлантириш бўйича давлат даражасида топшириқ бўлган ва бу катта туртки берди. Орадан вақт ўтиб, бунинг самараси кўрина бошлади. Бизда мамлакат ичида инфратузилмада ўсиш бўлмагунича, натижа талаб қилиш унчалик тўғри эмас. Аввало, уйни пойдевордан қуриш керак, сўнгра натижа талаб қилиш мумкин. Бизда қандай майдонлар бор, қандай футбол бор — шунга қараб ривожланяпмиз. Биз тўғри йўналишдамиз, мураббий Европача импульс бераяпти, лекин инфратузилмасиз бу жуда узоқ йўл. Шунинг учун вақт, қўллаб-қувватлаш ва ички ривожланиш керак.

Қаранг, қаерда ўйнаяпмиз? Атирауга қаранг, Актаудаги стадионга қаранг. Қандай даражадаги футболни истайсиз? Бизнинг чемпионат баҳордаёқ кураш билан бошланади. Европа стилига яқинлашишимиз билан бироз жонланиш бўлади, футбол кўрсата бошлаймиз. Лекин биз ривожланмаяпмиз, битта нуқтада туриб қолганмиз. Миллатлар лигасида бир бор натижа бердик — ва ҳаммаси шу билан тугади. У натижадан кейин стадионлар ривожланиши, ҳар бир совуқ шаҳарда манежлар қурилиши керак эди — масалан, Актобеда. Манежлар, унга одамлар келади, футбол кўради, футболчилар эса сифатли шароитда тўп тепади.

Шунинг учун биз “битта оёғимиз шол” ҳолда юрибмиз, чунки футболни алдаб бўлмайди. Биз натижа бердик, шундан хурсанд бўлиб юбордик ва уни қонуният деб қабул қилдик. Лекин у пайтда нимадир қилиш керак эди, ривожланишни давом эттириш керак эди, аммо биз битта нуқтада тўхтаб қолдик», — деди Малий.

Эслатиб ўтамиз, Қозоғистон терма жамоаси ЖЧ-2026 саралаш босқичидаги илк уй ўйинида Шимолий Македонияга 0:1 ҳисобида мағлуб бўлди. “Ордабаси” клуби аъзоси бўлган Сергей Малий ушбу учрашувни асосий таркибда бошлади.