Мадриднинг "Реал" клуби вингери Браим Диас тез орада клуб билан янги меҳнат шартномасини имзолайди. Бу ҳақда инсайдер Фабрицио Романо хабар бермоқда.
Манбага кўра, "Реал" 25 ёшли испаниялик футболчи билан кейинги беш йил давомида амал қиладиган янги келишув бўйича музокараларда сезиларли даражада олдинга силжиган. Қайд этилишича, томонлар деярли келишиб олган.
Браим Диас 2019 йилда "Реал" футболчисига айланган. Бу мавсумда у барча турнирларда 52 та учрашувда майдонга тушиб, олтита гол урди ва еттита голли узатмани амалга оширди. Футболчининг амалдаги шартномаси 2027 йилгача мўлжалланган.
