Мадриднинг "Реал" клуби бош мураббийи Хаби Алонсо жамоа ўйинини яхшилаш борасидаги режалари ҳақида гапирди.
Карло Анчелотти қўл остидаги сўнгги мавсумда "қаймоқранглилар" мувозанат етишмаслигидан азият чекди, бу ҳақда италияликнинг ўзи ҳам тез-тез гапирарди. Ҳужум юлдузларининг мудофаада жамоага ёрдам бера олмаслиги асосий муаммолардан бири ҳисобланган.
"Агар биз майдонда узоқ масофани босиб ўта олсак, ҳаммаси яхши ишлайди. Биз бу жиҳатга кўп эътибор берамиз. Замонавий футболда ҳимояда ишлаш катта аҳамиятга эга. Асосийси, ҳар бир фазада бирликни сақлаб қолиш. Вақтимиз оз эди, лекин бу ҳақда гаплашиб олдик. Клублар ўртасидаги жаҳон чемпионатининг сўнгги кунида биринчи кунгидан кучлироқ бўламиз," - деди Хаби Алонсо матбуот анжуманида.
