Миланнинг "Интер" клуби бош мураббийи Кристиан Киву жамоанинг "Монтеррей"га (1:1) қарши ўйиндаги ҳаракатлари ҳақида ўз фикрларини билдириб ўтди.
Руминиялик мутахассиснинг "нерадзуррилар" бошчилигидаги дебюти клублар ўртасидаги жаҳон чемпионати гуруҳ босқичининг 1-тур ўйинига тўғри келди. Милан жамоасининг ягона голига 43-дақиқада Лаутаро Мартинес муаллифлик қилди ва ҳисобни тенглаштирди.
"Биринчи бўлимда ҳисобда ортда қолаётган бўлсак-да, яхши ўйнадик. Биз ақллироқ ҳаракат қилишимиз ва тез-тез офсайдга тушиб қолмаслигимиз керак эди. Иккинчи бўлимда темпни пасайтирдик, аммо барибир бир нечта вазиятлар яратдик - рақиб дарвозаси олдида тажовузкорлик етишмади," - деди жорий ойда Симоне Индзагининг ўрнига келган Киву DAZN'га берган интервьюсида.
