Швециялик ҳужумчи Виктор Дьёкерешнинг “Спортинг”даги келажаги ноаниқлигича қолмоқда.

Record хабарига кўра, футболчи, унинг агенти ва клуб раҳбарияти ўртасидаги музокаралар боши берк кўчага кириб қолган.

Агентлар вазиятни ҳал қилишга уринди, аммо муросага эришилмади. Келишмовчиликка сўралган трансфер суммасини қайта кўриб чиқиш сабаб бўлди: “Спортинг” президенти Фредерико Варандас “Манчестер Юнайтед”, “Арсенал” ва “Ювентус” қизиқишлари туфайли нархни 70 дан 80 миллион еврога оширди.

Айнан шу қарор футболчи ва клуб раҳбарияти ўртасидаги муносабатларда кескинликни келтириб чиқарди. Шу билан бирга, манбага кўра, "Ювентус" кўрсатилган 80 миллион еврони тўлашга тайёр, аммо Португалия томонидаги ички келишмовчиликлар трансферни бузиши мумкин.