Италиянинг "Ювентус" клуби англиялик вингер Жэйдон Санчони сотиб олишга қизиқиш билдирмоқда. Журналист Марко Жордано хабарига кўра, туринликлар "қизил иблислар"нинг 25 млн евролик талабини қондиришга тайёр.
Манбага кўра, энди "Ювентус" Санчонинг ўзи билан шахсий шартлар бўйича келишувга эришиши керак. Қайд этилишича, футболчининг ўзи "Наполи"га ўтишни истамоқда, у ҳам футболчининг трансферига қизиқиш билдирмоқда.
Жэйдон Санчо ўтган мавсумни ижара асосида Лондоннинг "Челси" клубида ўтказди. "Кўклар" сафида барча мусобақаларда 42 та ўйинда унинг ҳисобида бешта гол ва 10 та голли узатма бор. Санчонинг "Манчестер Юнайтед" билан шартномаси 2026 йилнинг ёзига қадар мўлжалланган.
