"Манчестер Сити" ярим ҳимоячиси Клаудио Эчеверри клуб сафидаги илк голини урди.
Аргентиналик футболчи клублар ўртасидаги Жаҳон чемпионатининг 27-дақиқасида "Ал-Айн"га қарши ўйинда жарима зарбасидан тўғридан-тўғри зарба йўллаб, таблодаги ҳисобни 2:0 кўринишига келтирди. Бу 19 ёшли футболчининг "шаҳарликлар" сафидаги илк голи бўлди - унга атиги учта ўйин керак бўлди. Эътиборлиси, бугунги беллашув футболчи учун "Манчестер Сити" асосий таркибидаги дастлабкиси бўлди. Танаффусда Хосеп Гвардиола янги юлдузни Фил Фоденга алмаштирди.
Клаудио Эчеверри 2024 йил бошида Аргентинанинг "Ривер Плейт" клубидан 18,5 миллион еврога сотиб олинган эди. Ҳужумкор ярим ҳимоячининг шартномаси 2028 йилгача мўлжалланган.
