Мадриднинг "Реал" клуби ярим ҳимоячиси Лука Модрич фаолиятини "Милан"да давом эттиради. Бу ҳақда инсайдер Фабрицио Романо хабар берди.
Манбага кўра, 39 ёшли хорватиялик футболчи клублар ўртасидаги жаҳон чемпионати якунланганидан сўнг "Милан" билан шартнома имзолайди. Таъкидланишича, томонлар ўртасида оғзаки келишувга эришилган ва тиббий хулоса билан муҳрланган.
Модрич "Реал"да 2012 йилдан буён ўйнаб келмоқда. Жорий мавсумда у барча турнирларда 59та ўйинда қатнашиб, 4та гол урди ва 9та голли узатмани амалга оширди. 27 июнь куни "Реал" ЖЧ-2025 гуруҳ босқичидаги сўнгги ўйинини "Зальцбург"га қарши ўтказади.
