La Provence нашри хабарига кўра, "Марсель" ПСВ вингери Йоан Бакайокога қизиқиш билдирмоқда, у яна АПЛ ва Бундеслига клублари эътиборида бўлиб турибди.
Француз клуби Луис Энрике "Интер"га кетганидан кейин қанот ҳужумкор футболчи қидирмоқда. Бироқ, нашрнинг ёзишича, "Марсель" ҳозирча Бакайоко бўйича музокараларда олдинга силжимаган - ПСВ фақат клубнинг қизиқишидан хабардор, бошқа даъвогарлар эса аллақачон аниқроқ қадам ташлаган.
Бельгиялик футболчининг Нидерландия чемпиони билан шартномаси 2026 йилгача мўлжалланган, шу боис ПСВ футболчисини текинга йўқотмаслик учун ёзда уни сотиш масаласини кўриб чиқишга мажбур бўлади.
Маълумот учун, Бакайоко 2024/25 йилги мавсумда ПСВ сафида барча мусобақаларда 47 та ўйинда майдонга тушиб, 12 та гол урган ва 3 та голли узатмани амалга оширган.
