"Барселона"нинг собиқ директори Тони Фрейша испан оммавий ахборот воситаларига нисбатан кескин танқид билан чиқди.

Бунга "Атлетик" Бильбао жамоаси вингери Нико Уильямснинг эҳтимолий трансфери ҳақидаги хабарлар тўлқини сабаб бўлди. Ушбу хабарларда "Барса" "сусткашлик" ва "натижасиз шовқин" учун танқид қилинган. Фрейша матбуотни клубнинг обрўсига путур етказувчи ғаразли фикрлар яратишда айблади.

"Энди трансферларни экстрасенс амалга ошириши керакми? Музокаралар, қўнғироқлар, учрашувларсиз ва ҳатто матбуотга маълумот сизиб чиқмасдан. Агар журналистлар бу ҳаракатларни кўрмаса - демак, "Барселона" яна муваффақиятсизликка учради деганими? Ростданми? - деди Фрейша El Partidazo de COPE эфирида.

Унинг сўзларига кўра, клубга атайлаб икки хил мезон қўлланилади: агар бошқа йирик жамоа яширин тарзда музокара олиб борса - бу "профессионаллик" дейилади, агар "Барса" шундай қилса - "тартибсизлик ва масхарабозлик" деб баҳоланади.