Лондоннинг "Челси" клуби бош мураббийи Энцо Мареска клублар ўртасидаги жаҳон чемпионати доирасидаги "Бенфика"га қарши ўйиндаги узоқ муддатли танаффусдан ниҳоятда норози.
Жамоалар 86-дақиқагача ўйнашди, шундан сўнг ҳакам момақалдироқ туфайли ўйинни тўхтатишга қарор қилди. Пауза деярли икки соатга чўзилди. Учрашув давом эттирилганидан кўп ўтмай, "Бенфика" пенальтини аниқ амалга ошириб, ҳисобни тенглаштирди. Қўшимча бўлимларда "кўклар" учта гол уришди ва барибир кейинги босқичга чиқишди - 4:1.
"Бу қандайдир ҳазил, бу футбол эмас. Хавфсизлик нуқтаи назаридан тўхташларни тушунаман, лекин унда бу жой бундай ўйинларни ўтказиш учун мос келмаса керак. Йигитлар, ўйинларни икки соатга тўхтатиш - бу футбол эмас," - дея Маресканинг сўзларини келтиради журналист Низаар Кинселла.
