Мадриднинг "Реал" клуби ярим ҳимоячиси Федерико Вальверде жамоадоши Гонсало Гарсиянинг ўйини ҳақида қандай фикрда эканини айтди.
21 ёшли ҳужумчи сешанба куни клублар ўртасидаги жаҳон чемпионати 1/8 финалида "Ювентус"га қарши кечган баҳсда (1:0) "қаймоқранглилар"нинг ягона голига муаллифлик қилди. Умуман олганда, футболчи 2025 йилги КЎЖЧнинг тўртта ўйинида учта гол ва битта голли узатмани амалга оширган.
"Гонсало бунга лойиқ, у жуда тиришқоқлик билан ишлайди. У ҳали ёш, "Кастилья"дан келган, доим бизнинг соямизда туриб ҳаракат қилади. Биз у билан жуда фахрланамиз ва уни табриклашимиз керак," - деди ўйиннинг энг яхши футболчиси совринини қўлга киритган Вальверде DAZN билан суҳбатда.
