"Манчестер Юнайтед" мавсум олдидан 4 нафар футболчисини сота олмаяпти.
The Athletic нашри хабарига кўра, "Манчестер Юнайтед" бош мураббийи Рубен Аморим душанба куни мавсумолди йиғин бошлангунга қадар Маркус Рэшфорд, Жейдон Санчо, Алехандро Гарначо ва Антони жамоани тарк этишини хоҳлаган. Тахминларга кўра, уларнинг кетиши клубнинг маош фондини сезиларли даражада қисқартиради ва жамоада сўнгги икки мавсумда юзага келган айрим муаммоларни ҳал қилади. Бироқ, клуб тўрт нафар футболчининг бирортаси билан хайрлаша олмади.
Хабар қилинишича, ўтган ҳафта клуб Рэшфорд, Гарначо, Антони, Санчо ва Тирелла Маласиаларнинг машғулотларга қайтишини июль ойининг охиригача қолдириб, уларга янги жамоа топишга кўпроқ вақт ажратган. Беш футболчининг барчаси қарор ҳақида хабардор қилинган. Футболчиларга "Манчестер Юнайтед" базасидаги тиббий ва ёрдам муассасаларига киришга рухсат берилиши мумкин, аммо уларнинг жамоага қайтиши деярли имконсиз.
