"Манчестер Юнайтед" дарвозабон Андре Онанага нарх белгилади. Бу ҳақда Goal.com хабар бермоқда.
Манбага кўра, футболчидан қутулишни режалаштираётган "қизил иблислар" Франциянинг "Монако" клуби сўровидан сўнг аниқ нарх белгилаган. У 41 миллион долларни ташкил этди. Ушбу талаб монаколиклар учун жуда юқори бўлиб чиқди ва футболчининг ўзи ҳам, аввал хабар қилинганидек, карьерасини давом эттиришнинг ушбу вариантини рад этди.
Ҳозирча, шартномаси 2028 йилда тугайдиган Онана клубда қолиши ва 19 июлга белгиланган "Лидс"га қарши ўйинда асосий таркибда майдонга тушиши эҳтимоли сақланиб қолмоқда. Ўтган мавсумда 29 ёшли дарвозабон барча мусобақаларда 50 та ўйинда майдонга тушиб, 65 та гол ўтказиб юборган. Унинг ҳисобида 11 та "қуруқ" ўйин бор.
