"ПСЖ" ҳимоячилари Виллиан Пачо ва Люка Эрнандес "Бавария"га қарши ўйинда қизил карточка олиб, 2 та ўйинга дисквалификация қилинди. Жамоалар клублар ўртасидаги жаҳон чемпионатининг чорак финалида ўйнашди ва парижликлар 2:0 ҳисобида ғалаба қозонишди.
Икки ўйиндан иборат дисквалификациялар эса Пачо ва Эрнандеснинг АҚШдаги турнирда бошқа иштирок эта олмаслигини англатади. Вазиятни инобатга олган футболчилар жамоа қароргоҳини тарк этишди. Бу ҳақда "ПСЖ" матбуот хизмати хабар бермоқда. Пачо ва Эрнандес учун таътил эртароқ бошланди.
Клублар ўртасидаги жаҳон чемпионати ярим финалида "ПСЖ" "Реал"га қарши баҳс олиб боради. Жамоалар 9 июль, чоршанба куни майдонга тушади.
