Журналист Саша Тавольерининг маълум қилишича, "Сандерленд" "Лион" ҳужумчиси Жорж Микаутадзе учун курашдан чиқиб кетади. Инглиз клуби ҳақиқатан ҳам грузиялик футболчини ўз сафига қўшиб олишни истади ва ҳатто францияликларга мурожаат қилиб, трансфер имкониятини муҳокама қилди.

Бироқ "Лион" белгилаган бошланғич нарх "қора мушуклар" учун жуда қимматлик қилди. Тавольерига кўра, "Сандерленд"нинг ҳужумчи позицияси учун бюджети 20 миллион еврони ташкил этади, "Лион" эса 30 миллиондан бошланадиган таклифларни кўриб чиқишга тайёр.

Яқинда DNCG "Лион"ни Лига 2га тушириш ҳақидаги қарорини бекор қилгани француз клубининг мавқеини оширди. Гарчи "тўқувчилар" ҳали ҳам ушбу трансфер ойнасида сотувларга муҳтож ва тежамкорлик шароитида ишлаётган бўлса-да, улар энди қуйи дивизионга тушиб кетиш эҳтимоли бўйича босимсиз музокаралар олиб боришлари мумкин.

Эслатиб ўтамиз, Микаутадзе 2024/25 йилги мавсумда "Лион" сафида барча мусобақаларда 47 та ўйинда майдонга тушиб, 17 та гол урган ва 11 та голли узатмани амалга оширган.