"Порту" "Атлетико"дан Саму Омородион Агеховага бўлган ҳуқуқни тўлиқ сотиб олди.
Футболчининг дастлабки трансферидан сўнг, португал клубида ҳуқуқларнинг атиги 50 фоизи бор эди. Май ойи бошида улар яна 15 фоизни 5 млн еврога сотиб олганди.
Энди эса "Порту" шартномада кўрсатилган иккинчи сотиб олиш имкониятидан фойдаланиб, худди шу суммага футболчига қўшимча 15 фоиз иқтисодий ҳуқуқни қўлга киритди. "Атлетико" билан музокаралар давом эттирилди ва "Порту" қолган 20 фоиз ҳуқуқни 7 миллион еврога сотиб олди.
Шундай қилиб, португаллар энди Агеховага бўлган ҳуқуқларга тўлиқ эгалик қилишади.
21 ёшли форвард "Порту"га ўтганидан буён 45 та ўйинда майдонга тушиб, 27 та гол урди ва 3 та голли узатмани амалга оширди. Декабрь ойида у чемпионатнинг энг яхши ҳужумчиси ва ойнинг энг яхши футболчиси деб топилди.
Португалия клубидаги биринчи мавсум якунларига кўра, Саму чемпионат (19 гол) ва Европа Лигасида (6 гол) иккинчи тўпурарга айланди.
